Новости 306 0 4 года назад

АЙГӨЛ БАРИЕВАНЫҢ ҺӘР КОНЦЕРТЫ ҮЗЕНЧӘЛЕКЛЕ

Айгуль Бариева

Артист балаларының барысы да ата-ана юлыннан китми. Хәер, аларның күбесе алай булуын теләми дә. Сирәк талант иясе, мәрхүм артист Шамил Бариевның кызы җырчы Айгөл дә шундый фикердә икән.

Айгөл, быел ничәнче «сольный» концертыңны оештырасың?

- Өченче ел рәттән сольный концерт бирәм.

- Һәрберсенең үзенчәлекләре нидә? Санап үтсәң иде.

- Әйе, аларның һәрберсе миңа кадерле һәм үзенчәлекле. Иң беренчесен Камал театрыннан башладым. Һәм ул юкка түгел. Чөнки мин ул театрда үскән бала, минем әтием Шамил Бариев анда 20 елга якын эшләде, һәм шушы бинадан үземә ничектер хәер-фатиха алган кебек булдым. Һәрбер концертымны үзенчәлекле сценарий белән, режиссура алымнарын кулланып куярга тырышам. Тәүге концертымда да нәкъ шулай булды. Иҗатыма гашыйк булган кеше (Зөлфәт Зиннуров) минем белән компьютер аша аралаша. Ә инде икенче бүлектә мин аны үземнең концертыма чакырам. Режиссеры – Ринат Әюпов, сценарий авторы – Илнур Фәйзрахманов. Икенче концертым әкият рәвешендә булды. Хан кызына кияүләр эзләдек. Бу юлы Зөлфәт вәзир ролен башкарды. Сценариен шулай ук Илнур язды, ә идеясен «Сәйдәш» бию коллективының җитәкчесе Таһир тәкъдим итте. Үзем сәхнәгә куйдым. Ә инде быелгы концертыма килсәк, ул кайберәүләргә сәеррәк булып тоелыр. Чөнки ул бары тик урыс телендә барачак. Ул идея күптәннән күңелемдэ яши иде. Чөнки мин кечкенәдән үк Анна Герман һәм Мөслим Магомаев иҗатына гашыйк. Рөстәм Асаевка шалтыратып, шул идеямны тәкъдим иткәч, ул да бик теләп ризалашты. Шулай итеп бу концерт ике бөек шәхеснең якты истәлегенә багышланачак. Рөстәм Үтәй җитәкчелегендәге эстрада-симфоник оркестр катнаша. Минем уйлавымча, бу проект урыс милләтендә генә түгел, татарларда да бик зур кызыксыну уятачак. Чөнки чын сәнгать чикләүләргә һәм милләткә бүлгәләүгә буйсынмый ул.

- Белүемчә, балаларыңны да җыр-музыка мохитендә тәрбиялисең.

- Балаларым да,әлбәттә, мәдәнияткә тартылалар. Улым баянда уйнарга маташа,кызым җырлый-бии. Ләкин мин аларның артист булуын теләмәс идем.

- Җырчы булуның иң читен моменты нәрсәдә һәм иң рәхәт мизгеле нидә?

- Иң читене — син һәрвакыт үзеңне тиешле дәрәҗәдә тотарга тиешсең, сәхнәдә генә түгел, тормышта да. Чөнки кешеләр синең һәрбер әйткән сүзеңне, һәрбер эшеңне күзәтеп һәм бик нык тәнкыйтьләп торалар. Шундый инде артистның йөге. Ә инде иң рәхәте, әлбәттә, эшләгән эшеңнең нәтиҗәсен күрү.

- Синеңчә, татар эстрадасына ни җитешеп бетми?

- Зәвыклылык һәм профессиональлек җитми, минемчә.

- Продюсерың кем?

- Продюсерым юк, ләкин Аллага шөкер, тормышымда һәрвакыт ярдәмгә килә торган кешеләр очрап кына тора. Мин аларга мең рәхмәтлемен, чөнки бүгенге «базар» мөнәсәбәтләрендә берүзеңә эшләү бик авыр.

- Конкурсларда катнашканың бармы һәм ниндиләрендә катнашырга теләр идең?

- Иң беренче тапкыр «Ягымлы яз» конкурсында чыгыш ясадым.Анда катнашкач,үземә шундый нәтиҗә ясадым: бүтән конкурсларда катнашмаска. Гаделсезлек. Мин андый нәрсәләрне бик авыр кичерәм, күңелемә бик якын алам.

Ә инде җырга кагылмаган конкурслар турында сөйләгәндә, «Нечкәбил» конкурсын атыйм, «Матур Нечкәбил» номинациясендә җиңдем. Монда тагын бер кат үземнең беренче ясаган нәтиҗәмә инандым — барлык конкурслар «сатылган», һәм анда барысы да алдан ук билгеле.

автор: — источник:http://aksu-studio.ru/

Автор: Алия Гилачова

Добавить комментарий

Ваш e-mail не будет опубликован. Обязательные поля помечены *

Можно использовать следующие HTML-теги и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>