Новости 388 0 3 года назад

«Матур һәм сәламәт булыйк!»

Бүгенге кунакларыбыз – җырчылар Азат Фазлыев һәм Алсу Дәүләтгәрәева. Алсу тамашачыларга 2003 елда оешкан «Саф хисләр» төркеме аша таныш. Аның берсеннән-берсе матур көйләр иҗат итүе, фотога төшерү белән мавыгуы, музыка мәктәбендә балаларга белем бирүе турында да беләбез. Шул ук вакытта сөекле ире Азат һәм нәни уллары Аязны кайгыртырга да өлгерә. Бал корты Нечкәбил сыман тырыш ул Алсу.

Азатның ирешкәннәре дә бихисап: «Йолдызлык», «Сандугач керде күңелгә» фестивальләрендә, «Ватан» халыкара бәйгесендә катнашкан, Р.Ваһапов исемендәге һәм «Татар моңы» бәйгеләренең лауреаты булган егет ул. Азат белән Алсу бергәләшеп гастрольләргә чыгалар, туй-мәҗлесләргә ямь өстиләр. Хәйрия концертлары белән балалар һәм картлар йортларына йөриләр. Азат башкаруындагы «Картлар йорты» исемле җыр шул хәл белүләр тәэсирендә туган.

Соңгы араларда музыкаль гаилә Азат Фазлыевның концертына әзерләнү белән мәшгуль. Ул 27 мартта Филармония концерт залында булачак. Ә башкалабыз тамашачысы алдына тәүге тапкыр ялгыз чыгу – туй көне кебек үк истәлекле вакыйга, аны дулкынланып көтәсең. Матурлану-әзерләнү серләренең берничәсен Азат һәм Алсу сезнең белән дә бүлешерләр.

Алсудан киңәш:

– Мин бик шәп ябыгу ысулы таптым. Шуның ярдәмендә ике туганым 12 килограммга ябыкты. Җитен орлыгын кофетарткычтан чыгарасың, ул онга әйләнергә тиеш. Көнгә 3 тапкыр берәр аш кашыгы кабасың. Аны коры килеш йотуы авыр, шуңа күрә ахырдан кефир яки су эчеп куйсаң яхшы. Кичке алтыдан соң җиңелчә генә ашарга кирәк, рациондагы ипине дә киметәсе.

Җитен орлыгы организмны чистарта, аны кулланганнан соң, үзеңне җиңел хис итәсең. Әлеге ысулны миннән бик күп җырчылар язып алды. Сезгә дә файдасы тими калмас.

* * *

Аш-су бүлмәсендә кайнашучылар өчен дә бик җайлы һәм тәмле рецепт тәкъдим итәм. Әлеге «подливка»ны бәрәңге белән дә, токмач белән дә бирергә була. Иң элек суган белән уылган кишерне чуенда кыздырасы. Шуңа шакмаклап туралган ит салырга, ит пешәр алыннан болгар борычы өстибез. Пешәргә 1-2 минут кала соус белән катнаштырылган борчак салабыз. Әлеге ризык күңелегезгә хуш килер дип өметләнәм.

Азаттан киңәш:

– Тамак беткәндә, тавыш ярылары киеренке вакытта бик файдалы рецепт. Сырганак, шәфталу, абрикос, зәйтүн майлары – барысын бергә кушып болгатабыз. Мамыкны шушы катнашмага манып, борын тишекләренә тыгып, 10 минут ятып торырга кирәк. Әлеге файдалы майлар тавыш ярыларына агып төшәчәк. Моны төнгә каршы, ягъни ятар алдыннан эшләсәң, йогынтысы көчлерәк була.

автор:Рәйсә БОРҺАНИЕВА; источник:http://sahne.ru/

Автор: Алия Гилачова

Добавить комментарий

Ваш e-mail не будет опубликован. Обязательные поля помечены *

Можно использовать следующие HTML-теги и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>