Новости 575 0 3 года назад

Рамил Шарапов: «Театрдан китүемне әни авыр кичерде»

Рамил Шарапов

Куе кара кашлары аркасында «Мазда» кушаматы ябышкан Рамил Шарапов Буа сатира театрыннан киткәннән соң, аны мактаучылар да, хурлаучылар да булды. Инде аннан киткәнгә дә шактый вакыт узды.

– Рамил, сине халыкка Буа сатира театры танытты. Бирегә ничек килеп урнашу тарихыңны искә төшереп ал әле.
– Мин әлеге театрга кайчан кайтасымны белдем. Юллама белән укыдым чөнки. Раил Садриевка рәхмәт, бюджет бүлегендә укытты. Биредә биш ел эшләдем. Кеше гомеренең бер институт чоры инде бу. Европада кеше һәр биш ел саен эшен алыштырып тора бит, менә минем дә шулайрак булды инде.

– Китү карары ничек туды?

– Мәктәпне тәмамлагач та, оядан чыгып китәбез бит. Бу да шулай булды. Өйләнгәч, улым тугач, фикерләр үзгәрде. «Эшләсәм тагын бер ел гына эшлим», – дип уйлап куйдым. Китү теләгемне алты ай алдан әйттем. Артист кеше үсәргә тиеш. Ялгышсам да, абынсам да, җиңүгә ирешсәм дә – үзем гаепле.

– Барыбер күңелнең бер читендә сагыну хисе яшидер әле.

– Ничек әйтим? Коллективта булган кызык хәлләр, гастрольдәге маҗаралар сагындыра. «Елмай» проектын горурланып карыйм. Тарихка кереп калдым. Бик зур рәхмәт Буа сатира театрына!

– Киләчәктә яңадан юллар кисешеп, әлеге театр белән хезмәттәшлек итәргә уйлаганың юкмы?

– Уртак проектлар турында әйтәсеңме? Үзләре теләсәләр, мин әзер. Укучылар дөрес аңласын, мин театрны ташлап китмәдем, ә үз аягымда киләчәккә таба баруны сайладым.

– Раил Садриев белән ничек аерылыштыгыз?

– Дустанә мөнәсәбәттә калдык. Ир белән хатын кебек аерылыштык.

– Якыннарың, сине белүче буалылар театрдан китүне ничек кабул итте?

– Әнигә авыррак булды. Ара ерагайды чөнки. Иҗатка битараф булмаучылар: «Югалып калма!» – дип теләк теләде.

– Бүген кайларда эшлисең? Сине ничек күрергә була?

– Хөкүмәт эшендә эшлим. Дәүләт күләмендәге чаралар алып барам. Вазифам – алып баручы, педагог-оештыручы. Күптән түгел «Казан-Арена»да чираттагы бәйрәм концертын алып барганда, тамашачылар танып алды. Бер апа яныма килеп хәтта: «Син экраннардан гына җүләр, тормышта бик матур икәнсең», – диде.

– Рамил, киләчәккә планнарың нинди?

– Татарстан буйлап «сольный» концертлар оештырырга уйлыйм. Менә әле Пермь якларыннан кайтып төштек.

– Кайда яшисең?

– Буадагы фатирымны калдырып, гаилә белән Казанга күчендек. Фатир яллап торабыз.

БЕЛЕШМӘ:

Исеме: Шарапов Рамил Рафыйкъ улы;
Туган көне: 1990 елның 13 апреле;
Туган җире: Буа районының Адав-Толымбай авылы;
Гаиләсе: Әтисе – Рафыйкъ, әнисе – Равия, тормыш иптәше – Земфира; улы – Раян.
Белеме: Казан театр училищесы, Социаль-гуманитар белем институтында психолог белгечлеге алган. Читтән торып Мәдәният һәм сәнгать университетында укый.

автор:Ландыш КӘБИРОВА; источник:http://shahrikazan.com/

Автор: Алия Гилачова

Добавить комментарий

Ваш e-mail не будет опубликован. Обязательные поля помечены *

Можно использовать следующие HTML-теги и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>