Новости 538 0 3 года назад

Резидә Кадыйрова иреннән киткәнме?

Резеда Кадырова

Резидә Кадыйрова 1982 елда Казан шәһәренең 98 мәктәбендә укытучы булып эшли башлый. 1996 елда исә укытучылыктан китеп җыр дөньясына күчә.

– Резидә ханым, син бүгенге көндә иң популяр җырчы. Ничек шулай популяр була алдың?

– Популярлыкның сәбәбе шундадыр: мин җыр сайлаганда мәңгелек темаларга тукталам, онытыла торган җырларга түгел. Беренче тапкыр сәхнәгә “Шәмдәлләр” белән чыктым. Ул җыр хатын-кызлар күңеленә кереп калды. Сөйгәнен бик нык яратып та ялгыз калган хатыннар бик күп бит. “Мәхәббәт җимешләре” – балалар турында, ялгызлык темасына да җырлыйм. Кая барсам да “Әнием шәле”н җырла әле диләр, халык күңеленә кереп калган ул.

– “Шәмдәлләр”дә мескен, сөюгә тилмергән хатын образын тудыра алдың. Тормышта бит син бөтенләй бүтән, үзеңә ошаган ирне аертып алып китәргә дә мөмкинсең. Образ тудыру осталыгы каян килде?

– Әнием әйтә торган иде: “Мин күрмәгән аз калды, бохарада таз калды”, – дип. Мине тормыш хәйран гына суккалады. Кеше хәленә, ялгыз хатыннарның да хәленә керә алам. Һәрбер җырда образга керергә тырышам. 7нче сыйныфтан соң агитбригадада төп җырчы булып йөрдем. Әти-әни: “Хатын-кыз буларак бәхеткә тиенү өчен укытучы йә хисапчы булырга. Агроном йә колхоз рәисенә кияүгә чыгарга кирәк”, – диделәр. Әти-әнинең сүзен тыңламасам бик зур ялгышлык ясармын дип уйладым. Тыңлыйсы калмаган, 10 сыйныфны бетереп, туп-туры Консерваториягә юл тотасы калган икән… Укытучы булып эшләгәндә дә төрле чараларда җырладым. Бер чарага Туфан Миңнуллин килде: “Бу җырыңны радиога бир әле”, – диде. Шуннан китте инде…

– “Музыкаль дистә” хит-парадында да айлар буе сине күрсәттеләр. Бик яхшы күрендең. Главалар кызыгадыр инде сиңа…

– Син мине кызартасың…

– Резидә Кадыйрова бүгенге көндә Зәйнәпне дә орып бирә дигәннәрен ишеткәнем бар, дөресме?

– Юк инде, Зәйнәп профессиональ, укыган. Зәйнәпнең үз урыны, минем үземнеке. Зәйнәп матур җырлый, әмма салкын, тамашачы белән контакты юк аның. Бөтен яшь җырчылар ясалма, җылылык, җырның сүзләренә игътибар итмиләр. Җанын биреп, образга кереп җырлау юк. Репертуарыңны баетырга, халык белән аралашырга, үзеңне халыктан югары итеп тотмаска кирәк. Болар мине яратып калсыннар, мин бит болар алдында имтихан бирәм, диген.

– Резидә, иренеңне ал төскә катырак буягансың түгелме?

– Мин яратам ал төсне.

– Нинди акчага яшисең?

– Бераз бизнесым бар.

– Нинди?

– Әйтмим әле.

– Казлар, үрдәкләр үстереп сатасыңмы?

– Үстермим, эшләмичә генә акча алып ятам хәзер.

– Ни өчен укытучы булып кына эшләмәдең?

– Укытучылыктан җыр дөньясына үкенечкә калмасын дип киттем. Хулиган укучылар мине бик ярата иде, чөнки һәр баланың хәленә кердем. Башта гаилә хәле белән таныша идем. Кемнеңдер атасы эчкече, бала төне буе йокламыйча мәктәпкә килгән. Укучыларның өйдәге тормышларын да аңларга тырыша идем. Балаларга “икеле” куймадым. Илнур исемле укучым бар иде, әтисез үсте. “Өчле”гә генә укыды. Беркөнне шуның белән очраштык. Үз фирмасын ачкан. Ресторанга алып керде.

– Хыялыңдагы ир очраса, аңа кияүгә чыгар идеңме?

– Акыл хәзер алданрак йөри, үзем турында гына түгел, балалар турында да уйлыйм. Алар ул хыялдагы кешене ничек кабул итә бит әле, алар моңа кул куймас. Әле ул хыялдагы кеше яши башлагач үзгәрә, кимчелекләре күренә башлый. Ир затларына ышанмыйм, күбесен хөрмәт итмим.

– Ник?

– Авыр хәлдә калдырганнары булды. Күбрәк хатын-кызларны хөрмәт итәм. Бу тормышта авырлыкны күбрәк үз өстебезгә без алабыз: балалар үстерү, өйдә тәртип булдыру, акча эшләү дисеңме… Ирләр бик җиңелчә яшәргә ярата. Кайда акча эшләүче ирләр?! Без өйдә генә утырыр идек…

– Сафлыкка ничек карыйсың?

– Сафлыкны югалту безнең өчен тормыш беткән кебек иде. Әти-әни шулай тәрбияләгән чөнки. Бүген сафлык әллә бар, әллә юк. Бер кыз саф килеш тормышка чыкты: “Резидә апа, ул хәзер модада түгел икән. “Син беркемгә дә кирәк булмагансың икән”, дип әйтте ирем”, – диде.

– Үзең турында соңгы вакытта нинди гайбәт ишеттең?

– Син ирең белән аерылдыңмы әллә, дип сорыйлар. Үзем дә аптырыйм. Рөстәм Закировның хатыны Люция: “Резидә апа, Данис абый белән аерылдыңмы әллә?” – ди. Дөрес сүз түгел бу! “Кадеремне белмәдең” дигән җыр җырлагач шундый гайбәт чыкты микән әллә…

1(980)

автор: ГАБДЕРӘХИМ; источник:http://акчарлак-газета.рф/

Автор: Алия Гилачова

Добавить комментарий

Ваш e-mail не будет опубликован. Обязательные поля помечены *

Можно использовать следующие HTML-теги и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>