Новости 260 0 3 года назад

Җырлап яшибез

Ильназ Бах

 Бүген сәхифәбездә берьюлы ике кунак – җырчылар Илназ Баһ һәм Гүзәл Идрисова. Арча егете белән Яр Чаллы кызын Казан очраштырды. Танышып-кавышып, бик күркәм гаилә корып җибәрде алар. Инде уллары Камил үсеп килә, тиздән аңа 6 ай була.

Гүзәл:

«Мин бик тә мавыгучан кеше. Хәтерлим әле, балачакта кул эшләре белән кызыксынып китеп, бәйләү түгәрәгенә язылдым. Музыка мәктәбендә дә шөгыльләнгәнлектән, бу хакта әнигә әйтеп тормадым. Музыка дәресләренә «суына» баруымны сизгәч, моның чын сәбәбе барыбер ачыкланды. Әнием музыканың киләчәгем өчен мөһимрәк икәнен төшендереп, аңа игътибарны ныграк юнәлтергә киңәш итте. Еллар узгач, бу фикернең чыннан да дөрес булуын аңладым.

Нәни улыбыз Камил белән йөкле вакытта миңа апам бер журнал бүләк итте. Шуннан тагын бәйләү теләге уянды. Әлеге журналда җылы япма (плед) бәйләргә өйрәткәннәр. Рәсемнәренә караганда бик оригиналь килеп чыгарга тиеш ул. Япма төрле-төрле төстәге җепләр һәм төрлечә бизәкләп бәйләнгән 90 шакмактан тора. Алар 13x 13 см үлчәмле, 4 нче номерлы ыргак белән бәйләнә. Сабыебыз дөньяга килеп, күңелле мәшәкатьләр дөньясына чумгач, япма турында бөтенләй онытканмын. Беркөнне күзем шуңа төште, бәби йоклаган арада янә бәйләргә керештем. Һәрбер бәйләнгән шакмакны почмакларыннан катыргыга кадап куеп, өстенә дымлы чүпрәк ябып киптерергә кирәк. Шулай итсәң, бәйләм пөхтә була, бер-берсенә беркеткәндә дә уңайлы».

Илназ:

«Иң яхшы киңәш – төшенкелеккә бирелмәскә! Тормыш булгач, төрле хәлләр була, кәеф тә төшеп китә, үпкәлисең дә. Андый чакта мин үземне башка бер күңеллерәк эшкә багышларга, онытылырга тырышам. Күп җырларым менә шулай күңел тулганда язылды. Гомумән, яратып башкара торган эшегезгә таяныгыз андый мизгелләрдә. Җыр дөньясына тәүге адымнарын атлаучыларга киңәшем бар – ашыкмасыннар иде. Моны мин үз тәҗрибәмнән чыгып әйтәм. Авторлардан җырны алу белән аны яздырырга, радиоларга тәкъдим итәргә ашыкмаска кирәк, чөнки җыр башкарган саен яхшыра бара.

Тавышымны кайгыртам, салкын тидермәскә тырышам, тидерсәм яхшылап дәваланам. Иң яхшысы – чәйгә коньяк салып эчеп, юрганга төренеп яту. Мунча керәм, ул да сихәтле. Тавышның яңгырашы турында гына уйлау җитми, башкаручы тембры белән җырның текстына да үзеннән яңалык кертсә яхшы».

автор:Сәхифәне Рәйсә БОРҺАНИЕВА алып бара; источник:http://sahne.ru/

Автор: Алия Гилачова

Добавить комментарий

Ваш e-mail не будет опубликован. Обязательные поля помечены *

Можно использовать следующие HTML-теги и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>